बिर्तामोड, फागुन २२ । झापाको झापा गाउँपालिकाले सुत्केरी पोषण भत्तामा बृद्धि गरेको छ ।
सुत्केरी महिलालाई दिइँदै आएको पोषण भत्तामा एक हजार रुपैयाँ बढाएर तीन हजार पुर्याइएको अध्यक्ष जयनारायण शाहले बताए ।
अघिल्लो आर्थिक वर्षमा दुई हजार रुपैयाँ पोषण भत्ता दिने गरेको गाउँपालिकाले चालु आर्थिक वर्ष २०७९÷०८०मा भने एक हजार बढाएर तीन हजार बनाएको हो ।
सामाजिक सुरक्षा तथा पञ्जीकरण शाखाका प्रमुख गौरब संग्रौलाका अनुसार शिशुको ३५ दिनभित्र जन्मदर्ता गराएमा मात्र सुत्केरी तथा शिशु स्याहार कार्यक्रम अनुसार भत्ता पाइने छन् ।
गाउँपालिकाले सामाजिक घटना दर्तामा गाउँबासीलाई प्रोत्साहन गर्न यस्तो कार्यक्रम ल्याएको संग्रौलाले बताए ।
३५ दिनभित्र जन्मदर्ता गर्ने परिवारलाई बाल पोषणका लागि प्रतिसुत्केरी सहायता तीन हजार रुपैयाँका दरले प्रदान गर्न संघीय सरकारको राजश्व बाँडफाँड शीर्षकबाट १० लाख रुपैयाँ बजेट छुट्याइएको छ ।
गाउँपालिकाले गाउँबासीको हितमा निरन्तर कार्यक्रम सञ्चालन गरेको गाउँपालिका अध्यक्ष साहले बताए । साहले गाउँबासीको मृत्यु संस्कारका लागि समेत सहायता रकम १५ हजार रुपैयाँ मृतकका परिवारलाई दिने गरेको बताए ।
