बिर्तामोड, चैत २० । ‘पालिका सन्देश डट कम’ चौथो वर्षमा प्रवेश गरेको छ । पिएसटी नेपाल मिडिया प्रालिद्वारा सञ्चालित अनलाइन न्युज पोर्टल तेस्रो वर्ष पूरा गरी चौथो वर्षमा प्रवेश गरेको हो ।
डिजिटल अनलाइन मिडियाको भीडमा फरक अनलाइन मिडियाका रुपमा पालिका सन्देशलाई स्थापित गर्ने उद्देश्यले सञ्चालनमा ल्याइएको अध्यक्ष सुरज दंगालले बताए ।
उनले धेरै स्थापित मिडिया र नयाँ खुल्ने डिजिटल मिडियाको भीडमै जन्मिएको पालिका सन्देश डटकमका लागि समय चुनौतीपूर्ण रहेको र तीन वर्षको यात्रा सफल हुनुका पछाडि आम पाठकवर्ग, विज्ञापनज्ञाता र शुभेच्छुकहरुको अतुलनीय योगदान रहेको बताए ।
अनलाइनका प्रधान सम्पादक विष्णुप्रसाद लामिछानेले अनलाइन पत्रिकाले स्थापनाकालदेखि नै निष्पक्ष, सत्य, तथ्य र सन्तुलित समाचार प्रकाशन गर्दै आएको बताए ।
पालिका सन्देशले तेस्रो वर्ष पूरा गरेको अवसरमा छापा पत्रिकाको समेत सुरुवात गरेको छ । बुद्धशान्ति गाउँपालिकाबाट हरेक बुधबार प्रकाशन हुनेगरी पालिका सन्देश साप्ताहिकको थालनी गरेको हो ।
