बिर्तामोड, जेठ २६ । जल तथा मौसम विज्ञान विभागको मौसम पूर्वानुमान महाशाखाले यस वर्षको मनसुनी वायु डेढ सातापछि नेपाल प्रवेश गर्ने जनाएको छ ।
महाशाखाका अनुसार यस वर्षको पानी पार्ने मनसुनी वायु भारतको दक्षिणी भाग केरला आइपुगेको छ । नेपालमा मनसुनी वायु प्रवेश गरेपछि मात्र मनसुनी वर्षा सुरु हुन्छ ।
केरला आइपुगेको मनसुन नेपाल आइपुग्न सामान्यतयाः १२ दिन लाग्छ । मौसमविद्हरुका अनुसार कहिलेकाहिँ एक वा दुई दिन तलमाथि पनि हुन्छ ।
केरला आइपुगेको मनसुनी वायु बंगालको खाडीबाट उत्तरपूर्व हुँदै नेपालको पूर्वी जिल्ला झापाबाट नेपालमा भित्रन्छ ।
गत वर्ष नेपालमा जुन ५ मा मनसुनी वायु प्रवेश गरिसके पनि यस वर्ष करिब जुन २० तिर मात्र मनसुनी वायु नेपाल पस्ने सम्भावना रहेको मौसमविद्हरु बताउँछन् ।
