बिर्तामोड, भदौ ११ । झापाको बिर्तामोडमा आज बिहान मृत भेटिएका मानिस हिँड्दा-हिँड्दै नालामा लडेको जिल्ला प्रहरी कार्यालय झापाले जनाएको छ ।
ती व्यक्ति हिजो राति पानी परिरहेको समयमा एक्कसि नालामा खसेको सिसीटिभी क्यामेरामा देखिएको झापाका प्रहरी प्रवक्ता खगेन्द्रप्रसाद रिजालले जानकारी दिए ।
आज बिहान मुक्तिचोक छेउमा रहेको प्रसाईं सुपर मार्केट अगाडि ती व्यक्ति मृत अवस्थामा फेला परेका थिए । उनी नाला (ड्रेन) भित्र मृत अवस्थामा भेटिएका थिए ।
नालीभित्र पानी जमेको र उनी त्यसमा पल्टिरहेको अवस्थामा एकाबिहानै भेटिएका हुन् । घटनास्थलमा उनले प्रयोग गरेको साइकलसमेत भेटिएको छ ।
मृतकको पहिचान खुल्न सकेको छैन भने थप अनुसन्धान भइरहेको घटनास्थलमा रहेका प्रहरीले जनाएको छ । उनको पोस्टमार्टमपछि मात्र थप बुझ्न सकिने रिजालले जानकारी दिए ।
