बिर्तामोड, असोज १ । काठमाडौँमा आयोजित ११ औँ कोरियन एम्बेसडर खुला अन्तर्राष्ट्रिय तेक्वान्दो प्रतियोगितामा झापा बुद्धशान्तिका खेलाडीले एक स्वर्णसहित रजत र कास्य पदक जित्न सफल भएका छन् ।
नेपालस्थित दक्षिण कोरियाली दूतावास र नेपाल तेक्वान्दो संघद्वारा संयुक्त रुपमा आयोजित प्रतियोगितामा जयपुर तेक्वान्दो डोजाङबाट सहभागी रेश्मा भुजेलले ५२ जना प्रतियोगिलाई पछि पार्दै ४९ केजी तौल समूहको फाइट गेरोगीमा स्वर्ण पदक जितेकी हुन् ।
त्यस्तै, पुम्से विधामा खुसी गौतम, आर्जु पोखरेल र आयुषा बोहोराले रजत पदक जितेका छन् भने निर्मला रसाइली, पेसल बोहोरा र एन्जिला दर्जीले कास्य पदक हासिल गरेको अन्तर्राष्ट्रिय तेक्वान्दो खेलाडी तथा जयपुर तेक्वान्दो डोजाङका प्रशिक्षक चन्द्र गौतमले जानकारी दिए ।
प्रशिक्षक गौतमका अनुसार आठजना खेलाडी प्रतियोगितामा सहभगी थिए । जसमा रेश्माले फाइट गेरोगीमा स्वर्ण पदक जितिन् भने अन्य तीनतीन खेलाडीले पुम्से विधामा रजत र कास्य पदक जितेका हुन् ।
प्रतियोगितामा ७११ महिला र एक हजार ६७ पुरुष गरी कुल एक हजार ७७८ जना सिनियर तथा जुनियर खेलाडी सहभागी थिए । पुम्सेतर्फ २५ र ग्यरोगी (फाइट) तर्फ ३२ गरी जम्मा ५७ स्वर्ण पदकका लागि प्रतिस्पर्धा भएको थियो ।
