बिर्तामोड, साउन ३१ । झापाको हल्दिबारीका गंगा प्रसाईं र उनकी बुहारीलाई घरमै आएर हत्या गर्न खोज्ने एकजना व्यक्ति पक्राउ परेका छन् ।
पक्राउ पर्नेमा बिर्तामोड-९ गरामनी बस्ने अन्दाजी ३४ वर्षीय दिपक पौडेल रहेका छन् । हिजो दिउँसो ३ः३० बजे पौडेलले हल्दिबारी–२ प्रसाईंबस्तीस्थित नेपाली कांग्रेसका गाउँ समितिका सभापति प्रसाईंको घरमै आएर प्रसाईं र उनकी बुहारी अन्दाजी ३० वर्षीया रेखा खरेल प्रसाईंमाथि धारिलो हतियार सिक्कल प्रहार गर्न खोजेका थिए ।
तर, त्यहाँ भएका स्थानीयबासीले जोगाएका थिए । हल्दिबारी प्रहरीले उनलाई नियन्त्रणमा लिई साँझ ६ः३० बजे जिल्ला प्रहरी कार्यालय चन्द्रगढी पठाएको छ । प्रहरीले उनले प्रयोग गरेको प्र. १–०१–०१२ प ५५७३ नम्बरको मोटरसाइकलसमेत बरामद गरेको छ ।
केही वर्षदेखि साउदी अरबमा बस्दै आएका पौडेलले विगत एक वर्षदेखि सामाजिक सञ्जालमार्फत बुहारी रेखालाई धम्क्याउने तथा गालीगलौज गर्दै आएका थिए ।
उनले ससुरा गंगा र बुहारी रेखालगायत प्रसाईं परिवारका अन्य सदस्यहरुको पनि सामाजिक सञ्जालमार्फत चरित्र हत्या गरेपछि गत वर्षको चैत महिनामा पौडेलमाथि जिल्ला प्रहरी कार्यालय झापा र काठमाडौँको हनुमान ढोकास्थित साइबर ब्युरोमा साइबर अपराधसम्बन्धी उजुरी गरिएको थियो ।
सोही विषयलाई लिएर पौडेलले रेखा र गंगालाई हतियार प्रहार गर्न खोजेको जनाइएको छ ।
