बिर्तामोड, भदौ २० । झापाको बिर्तामोड बसपार्कमा जन्मदिन मनाउन बोलाएर चक्कु प्रहार भएको छ । चक्कु प्रहारबाट दुईजना बालक घाइते भएका छन् । घटना भदौ ९ गतेको हो ।
पीडित परिवारका सदस्यले हिजो मात्र प्रहरीमा जाहेरी दिएपछि घटना बाहिर आएको हो । इलाका प्रहरी कार्यालय अनारमनीमा शरीर बन्धक सम्बन्धी मुद्दामा जाहेरी परेको प्रहरीले जनाएको छ । प्रहरीले जाहेरीपछि अनुसन्धान प्रक्रियालाई अघि बढाएको छ ।
अर्जुनधारा–११ बिर्तामोड नयाँ बसपार्कमा साथीहरु बोलाएर कोठामा बन्धक बनाएर हात बाँधेर चक्कु समेत प्रहार गरेको घटना बाहिर आएको हो । हात काटेर रगतले टिका लगाइएको तस्वीरमा देख्न सकिन्छ ।
आफ्नो जन्मदिन मनाउन बोलाएर घरमा साँझ ७ बजेदेखि १० बजेसम्म बन्धक बनाइएको हो । दुई बालकहरुको मुखमा कपडा खाँदेर चक्कु प्रहार गरिएको एक आफन्तले जानकारी दिए । हल्ला गरेमा मारेर चिया बगानमा फालिदिने धम्की दिएको पीडित बालकहरुले परिवारलाई जानकारी दिएका छन् ।
फुटबल खेल्दा चिनेको साथीले जन्मदिनमा बोलाउँदा छोराहरु गएको पीडित परिवारका अभिभावकले बताए । घरमा कोही नभएको बेला बन्धक बनाएर चक्कु प्रहार भएको हो ।
बुबाले प्रहरी लिएर आउदैछौँ भनेर फोनमा भनेपछि अर्जुनधारा–६ का पीडित दुई बालकहरुलाई मुक्त गरिएको थियो । चक्कु देखाएर बन्धक बनाउनेले फोनमा साथीको जन्मदिन मनाएर बसिरहेको र भोलि मात्रै घर आउने भन्न लगाएका थिए ।
छोराहरु घर नआएपछि अभिभावकले लोकेसन पत्ता लगाइसकेको र तिमीहरु भएको ठाउँमा आउने भनेपछि बन्धक बनाउनेहरु फरार भएका थिए ।
प्रहरीले जन्मदिन मनाउन बोलाएर चक्कु प्रहार गर्नेलाई पक्राउ गरिसकेको छ भने सहयोग गर्नेहरु फरार रहेको बुझिएको छ ।
