बिर्तामोड, माघ २८ । पाँचौँ कोशी प्रदेशस्तरीय आइटिएफ तेक्वान्दो प्रतियोगिताको उपाधि झापाले जितेको छ । झापाले ३ स्वर्ण, ४ रजत र ३ कास्य पदक ल्याएर उपाधि जितेको हो ।
मोरङको बेलबारीस्थित बलुवाई आइटिएफ तेक्वान्दो डोजो डाँगीहाटले आयोजना गरेको प्रतियोगितामा झापाले प्रदेशका ११ जिल्लालाई पछि पार्दै उपाधि जितेको हो ।
प्रतियोगितामा मोरङले ३ स्वर्ण, ३ रजत र ७ कास्य तथा सुनसरीले ३ स्वर्ण, ३ कास्य र ५ रजत पदक जितेर दोस्रो र तृतीय भएको छ ।
प्रतियोगिताअन्तर्गत महिला ४०–४५ तौल समूहमा सुनसरीकी करुणा विष्ट प्रथम, आयोजककी बिलिसा माझी द्वितीय, तृतीय मोरङकी प्रिया माझी र पाँचथरकी चरितमा राई भइन् ।
महिला ४६–५० तौल समूहमा सुनसरीकी एलिका विक, झापाकी नम्रता सिगु र मोरङकी अनुस्का धिमाल पहिलो, दोस्रो र तेस्रो भए । त्यस्तै, ५१–५५ तौल समूहमा सुनसरीकी बिट्नी राई, मोरङकी प्रिया राय र झापाकी रेसिका बराल पहिलो, दोस्रो र तेस्रो भए ।
५६–६० तौल समूहमा भोजपुरकी सजिना तामाङ, सुनसरीकी एलिजा राई र आयोजककी दिक्षा लिम्बू र पायल मगरले पहिलो, दोस्रो र तेस्रो पदक जिते ।
त्यस्तै, ६१–६५ तौल समूहको स्वर्ण झापाकी सेहना लिम्बू, रजत आयोजककी दिक्षा खड्का र मोरङकी मोरङकी मनिषा भूर्तेल तथा इलामकी नैना खातुनले कास्य जिते ।
६६ माथिको तौल समूहमा आयोजककी एलिजा राजवंशी पहिलो र झापाकी सुष्मा आक्षमी दोस्रो भइन् ।
पुरुषको ४५–५० तौल समूहको प्रथम मोरङका प्रकाश शर्मा, द्वितीय झापाको सौरभ श्रेष्ठ, तृतीय पाँचथरको मनिष राई र भोजपुरको दिपक राई भए । ५१–५५ तौल समूहको प्रथम पाँचथरका आलोक राई, द्वितीय सुनसरीको पीयूष श्रेष्ठ, तृतीय झापाका सनम चौधरी र मोरङका आरकेस चौधरी भए ।
यसैगरी ५६–६० तौलमा झापाका प्रितम धिमाल पहिलो, इलामका दिपप्रसन राई द्वितीय र मोरङका कमल थापा र पाँचथरका सिमन सेलिङ तेस्रो भए । ६१–६५ केजी तौलमा मोरङका लक्ष्मण राजवंशी, झापाका मनिष श्रेष्ठ र आयोजकका सोनुदेव पोद्दार पहिलो, दोस्रो र तेस्रो भए ।
६६–७० तौल समूहको प्रथम मोरङका प्रथम कार्की, द्वितीय भोजपुरका सुन्दर गुरुङ, तृतीय पाँचथरका सक्षम बराइली र सुनसरीका सुरज बराइली, ७१ किलो माथिको तौल समूहको प्रथम झापका अनोमल लिम्बू, द्वितीय आयोजक विकास ठाकुर, तृतीय मोरङका निशान्त भूजेल र धनकुटाका युनिक राई भए ।
दुई दिनसम्म भएको प्रतियोगितामा ११ जिल्लाका १६३ जना खेलाडीहरुको सहभागिता रहेको नेपाल इन्टरनेसनल तेक्वान्दो महासंघका अध्यक्ष प्रविणकुमार कार्कीले जनाए ।
