बिर्तामोड, साउन १२ । झापामा शुक्रबार बिहान भारी वर्षा भएकाले जलमग्न भएको छ । जल तथा मौसम विज्ञान विभागको बाढी पूर्वानुमान महाशाखाका अनुसार झापाका बिर्तामोड, दमक, शनिश्चरे र चन्द्रगढीमा भारी वर्षा भएको हो ।
महाशाखाले आज बिहान ६ बजे सूचना जारी गर्दै पछिल्लो तीन घण्टायता भारी वर्षा भएको उल्लेख गरेको छ । वर्षाका कारण बिरिङ, रतुवा लगायत साना खोलामा आकस्मिक बाढी आउन सक्ने जोखिम भएकाले उच्च सतर्कता अपनाउन आग्रह गरेको छ ।
प्रभावित क्षेत्रका बासिन्दालाई एसएमएस पठाएर सतर्कता अपनाउन जल तथा मौसम विज्ञान विभागले अनुरोध गरेको छ ।
अहिले देशभर आंशिकदेखि सामान्य बदली रही थोरै स्थानहरूका साथै एक–दुई स्थानमा हल्कादेखि मध्यम वर्षा भइरहेको विभागले जनाएको छ । आज कोशी प्रदेशका एक–दुई स्थानमा मेघ गर्जन/चट्याङसहित भारी वर्षाको समेत सम्भावना रहेकाले सतर्कता अपनाउन विभागले आग्रह गरेको छ ।
