बिर्तामोड, फागुन ५ । प्रथम झापा जिल्ला अन्तरपालिका टि–२० पुरुष क्रिकेट प्रतियोगितामा भद्रपुर नगरपालिका र कचनकवल गाउँपालिका विजयी भएका छन् ।
बर्खा स्मृति प्रतिष्ठान बुद्धशान्तिको आयोजनामा जारी प्रतियोगिताको पहिलो खेलमा भद्रपुरले दमक नगरपालिकालाई ७ विकेटले पराजित गरेको छ ।
पहिले ब्याटिङ रोजेको दमकले १७.३ ओभरमा अलआउट हुँदै ११७ रन बनाएको थियो ।
११८ रनको लक्ष्य पछ्याएको भद्रपुरले १०.१ ओभरमा ३ विकेटको क्षतिमा लक्ष्य प्राप्त गर्न सफल भयो । भद्रपुरका लागि ४७ रन बनाएका नितेश पौडेल प्लेयर अफ दि म्याच घोषित भए ।
त्यस्तै, दोस्रो खेलमा कचनकवल गाउँपालिका विजयी भयो । अर्जुनधारा नगरपालिका विरुद्ध कचनकवल ३ विकेटले विजयी भएको हो ।
पहिले ब्याटिङ रोजेको अर्जुनधाराले निर्धारित २० ओभरमा ६ विकेट गुमाउँदै १३४ रन बनाएको थियो । १३५ रनको लक्ष्य पछ्याएको कचनकवलले ७ विकेट गुमाउँदै १८.२ ओभरमा लक्ष्य प्राप्त गर्यो ।
कचनकवलका लागि ३१ रन बनाउनुका साथै २ विकेट लिएका कप्तानसमेत रहेका अनिल लामिछाने प्लेयर अफ दि म्याच घोषित भए ।
झापाका १५ वटै पालिकाको सहभागिता रहेको प्रतियोगितामा विजेताले नगद १ लाख, मेडल, ट्रफी, प्रमाणपत्र पाउनेछ भने उपविजेताले नगद ५० हजार, मेडल, ट्रफी, प्रमाणपत्र पाउने प्रतिष्ठानका अध्यक्ष मदनकुमार प्रसाईंले बताए ।
खेलमा प्लेयर अफ दि म्याचलाई २ हजार, फाइनलको दिन प्लेयर अफ दि म्याचलाई ५ हजार र प्लेयर अफ दि सिरिजलाई १० हजार पुरस्कार दिइनेछ ।
