बिर्तामोड, भदौ १२ । आमाछोरीलाई ठक्कर दिएर भागिरहेका दमकका सिटीसफारी चालक फिलिप भन्ने लछुमन लिम्बूलाई दुई महिनापछि प्रहरीले पक्राउ गरेको छ ।
जिल्ला प्रहरी कार्यालय झापाका अनुसार दमक-९ बस्ने ५५ वर्षीय लिम्बूले गत असार १४ गते दिउँसो १ः४५ बजे दमक १ बरगाछीस्थित भित्री सडकखण्डमा चलाएको मे. १ ह ६४०९ नम्बरको सिटीसफारीले आमाछोरीलाई ठक्कर दिएको थियो ।
पैदलयात्री काठमाडौँ दक्षिणकालीका-१ घर भई हाल दमक-१ बस्ने शर्मिला नेम्वाङ र उनकी छोरी २ वर्षीया आरोसी मगरलाई सिटीसफारीले ठक्कर दिई घाइते बनाएको थियो ।
घाइतेहरुलाई उपचारको लागि लाइफलाइन अस्पताल दमक लगिएकोमा उपचारको क्रममा घाइतेमध्ये आरोसीको सोही दिन मृत्यु भएको थियो ।
घटनापछि भागिरहेका तेह्रथुम थोक्लाङ घर भई हाल दमक-९ बस्ने लिम्बूलाई हिजो साँझ ६ बजे दमक ८ गणतन्त्रचोकमा लुकेर बसिरहेको अवस्थामा पक्राउ गरिएको हो ।
