भद्रपुर, कात्तिक २० । लागुऔषध ब्युरो काँकरभिट्टाको प्रहरी टोलीले मेची पुलअगाडिबाट ब्राउन सुगरसहित एकजनालाई नियन्त्रणमा लिएको छ ।
पक्राउ पर्नेमा झापा शिवसताक्षी १ का २७ वर्षीयको पुकार तामाङ रहेको जिल्ला प्रहरी कार्यालय झापाले जनाएको छ ।
तामाङलाई आज बिहान भारतको पानीट्यांकीबाट काँकरभिट्टातर्फ सिटी सफारीमा आउँदै गर्दा मेची पुलमा जाँच गर्ने क्रममा ब्राउन सुगरसहित पक्राउ गरिएको हो ।
उनको साथबाट प्लास्टिकबाहेक ६ ग्राम लागुऔषध (खैरो हेरोइन) बरामद गरिएको छ । उनलाई झापा जिल्ला अदालतबाट चार दिनको म्याद गरेर इलाका प्रहरी कार्यालय काँकरभिट्टाको हिरासत कक्षमा राखेर अनुसन्धान सुरु गरिएको छ ।